Ena dodonu me digitaka na tamata yadua na nona sala ena bula oqo. Na sala oya e rawa ni tini kina bula se kina mate. Na Vunau ni Kalou e gadrevi ena kena kilai na i cavacava ni sala ruarua.

“ Na luvequ, mo vakabauta nai vakaro i tamamu, Ka kakua ni biuta na vunau i tinamu: Vauca tikoga ki lomamu, Bukia ki domomu (Vosavakaibalebale6:20-21) Vauca ki nai qaqalo ni ligamu, Vola sara ki na lomamu. (Vosavakaibalebale 7:3) Me curumi keda na vunau. Me lewa na vei ka eda vakila, noda vakanananu kei na vei ka eda vakabibi taka ena noda bula. VAUCA SARA ki na lomamu. E dodonu me dua na iyau talei vei keda na Vunau. Sa dodonu me laurai na noda lomana ka rokova. BUKIA ki domomu Me liutaka na vei ka eda cakava na vunau. Me sala vata kei na Vunau na vei ka eda cakava. VAUCA ena ligamu. E dodonu me toqai to e utoda (Jeremaia 31:33), ka me rawa ni da nanuma tiko ka maroroya tiko. VOLA ENA vatu ni utomu.

Ni ko sa lako voli, ena tuberi iko; Ni ko sa moce koto, ena maroroi iko; Ia ni ko sa yadra cake, ena veivosaki kei iko. Ni sa cina nai vakaro, ka rarama talega na vunau; Ka sa kena sala ni bula nai vakavuvuli ni vunau (Vosavakaibalebale 6:22-23) Mo muria na noqu i vakaro, mo bula; Kei na noqu vunau me vaka na loa ni matamu. (Vosavakaibalebale 7:2)

Me maroroi iko mai na yalewa ca, Kei na nona vosaveicavilaki na yalewa tani. Kakua ni domona e lomamu na nona matavinaka; Me kakua talega ni rawai iko ko koya e na dakudaku-ni-matana. (Vosavakaibalebale 6:24-25) E vakamacalataka o Solomoni na iwalewale ni nona rawa ni temaki edua me domona edua. Ena kena vunitaki vinaka toka vakailawaki o na rawa ni o sega saraga ni vakila ni o sa temaki tiko. Sa sega e dua e vale oqo me levu cake vei au, a sa sega e dua na ka sa bureitaka vei au, ko iko duaduaga, ni ko sa watina: au na qai cakava rawa vakaevei na ka ca vakaidina oqo, KAI VALAVALA CA VUA NA KALOU? (Vakaitekivu 39:9) O koya e veitemaki tiko, se yalewa se tagane e vakayagataka na vosa e veisiwati. E rawa saraga ni vakayagataka tiko mai na vei ka vakalotu ena nona vei siwati. Na Vunau ga kei na yalo dina vua na Kalou ena rawa ni vorata na veitemaki ya, me vaka na talanoa kei Josefa.

Sa sega e dua e cati koya na butako, kevaka sa butako me mamau kina ni sa viakana; Ia kevaka sa kune, ena sauma vakavitu; ena solia na ka kecega e nona vale. (Vosavakaibalebale 6:30-31) Ena so na gauna ena vaka e “donu” se veirauti vinaka na ca. A cava ga ena cakava, e na sega ni rawa ni vakadonui na noda inaki kevaka e voroki na vunau ni Kalou. Na ivalavala ca ena muria edua tale na ivalavala ca. Ke sa donu vei keda edua na butako lailai, eda na rawa ni vakadonuya edua na butako levu, se lasu se veibutakoci. Oya na vuna e vola itukutukutaka kina na veibutakoci o Solomoni (Vakaibalebale 6:32-35). Kevaka e totogitaki o koya e butakoca na ka e kania ena levu ni nona via kana, e na dodonu me levu cake na kena totogi o koya e butakoca na rogorogo vinaka ni nona bula e dua. E sa vakavuna tu o koya edua na leqa levu ni bula savasava.

Sa la’ki muri koya sara, Me vaka na pulumokau ni sa la’ki vakamatei, se vaka na lialia ni sa la’ki vesuki e nai vesu kau; ka me qai laubasikataka na yatena na gasau; me vaka na manumanu sa kusarawa yani ki nai cori, ka sa sega ni kila ni sa ka me mate kina. (Vosavakaibalebale 7:22-23) E vakasalataki keda tiko o Solomoni ena ivalavala ca ka vakayagataka tiko na yaloyalo ni yalewa dautagane. Na valavala ca e kauti keda sobu kina ibuubulu (tikina 27); kina mate tawamudu. Ia eda muria na sala oya ena levu na gauna ka sega ni kauwaitaka tu me vaka edua na manumanu. E rawa ni da muria edua ga vei rau na sala e rua oqo: Na matai ni sala e na tini kina bula tawa mudu, na kena ikarua kina mata tawa mudu. Na sala cava o na digitaka?

“ E gadrevi mo vakananuma vakabibi na vei ka oqo ka me dei na vei ka mo vakayacora ka me yavutaki ena vakavuvuli dodonu ni Vosa ni Kalou. Oqo na gauna ni nomu na temaki ka vakatovolei; o na vorata rawa li na meca? Se o na biuti iko ena dua na vanua ena rawa ni vakayacora kina vei iko na nona kaukauwa? Oqo esa ka ni bula kei na mate vei iko, ka me vukei iko na Turaga mo raica na vei dai kece e tuvana e nomu sala o Setani ka mo na levea rawa, ka kubeti Jisu matua e yalomu, lomamu kei na nomu kaukauwa taucoko.” E.G.W. (Letters to Young Lovers, section 4, pg. 84)