Exodus 36 1 "Bazalel le Oholiab le Bawipa nih thiamnak le hngalhnak a pekmi zungthiammi vialte hna, biakinn saknak caah a herhmi thil paohpaoh tuah a thiammi hna nih khan, zeizong vialte cu Bawipa nih a chimning tein an ser awk a si lai," a ti hna. 2Moses nih Bezalel le Oholiab le Bawipa nih thiamnak a pekmi zungthiam pawl vialte, rian ṭ uan awk caah timhcia in a ummi vialte hna kha a auh hna i rian cu thawk cang u tiah a ti hna. 3Israel mi nih biakinn saknak caah an thawhmi thawhlawm vialte cu Moses nih khan a pek hna. Israel mi nih khan an thawhlawm cu zingfate in Moses sinah khan an rak put lengmang.

4Biakinn a satu zungthiam pawl nih khan an rian cio cu an kaltak zau i Moses sinah cun an ra i 5"Bawipa nih a kan fialmi rian ṭ uannak caah mi zapi nih an rak putmi cu a za leng a si cang," an ti. 6Cucaah riahhmun chungah cun Moses nih bia a thanh i, "Biakinn saknak ca thawhlawm kholhmi ah ahohmanh nih, nu nan si ah pa nan si ah, rak tho ti hlah u," a ti. Cuticun mi nih khan thil rak put cu an ngol. 7An rak put cia kha rian a dihlak limnak ding caah a za leng a si cang.

8Rian a ṭ uanmi hna lak i zungthiam bikbik pawl nih khan Pathian umnak thlam cu an ser. Puan zun hra in cu biakinn cu an ser i cu puan cu khumlahrual hmang ṭ hia le tuuhmul dum, sendung le a sen in tahmi an si i an cungah cherubim kha dawh tein an suai hna. 9Puan cu an i ngaw dih i a sau pe sawm li le pe hnih, a kauh pe ruk cio an si.10Puan zun nga cu hmunkhat ah an ṭ hit hna i a dang zun nga zong cu hmunkhat ah an ṭ hit ve hna. 11An bu a lenglei bik i a ummi puan tlang ah khan puan dum in hnam an sih hna.

12Bu khatnak puan hmasa bik ah khan hnam sawm nga an sih hna i bu hnihnak puan a hmanung bik ah khan, bu khatnak he i rup dingin hnam sawm nga ṭ hiam ṭ hiam an sih fawn hna. 13Sui sio sawm nga an ser hna i cu sui sio cun an bu hnih cun hmunkhat ah an peh hna. Cuticun Pathian umnak thlam cu inn pakhat ah a cang. 14Cun meheh hmul in puan zun hleikhat an ser hna i cucu Pathian umnak thlam cung i a ummi thlam kha a si. 15Zun khat cu pe sawm li le pe nga cio an sau i pe ruk cio an kau, an dihlak in an i ngaw cio. 16Zun nga kha bu khat ah an ṭ hit hna i a dang zun ruk kha bu khat ve ah an ṭ hit hna.

17Bu khatnak puan hmanung bik ah khan a hnam sawm nga an sih hna i a dang bu zongah khan cu bantuk ṭ hiam ṭ hiam cun sawm nga an sih ve hna. 18Cu bu hnih pehnak ah cun dar sio sawm nga an ser hna i cuticun thlam khat ah a cang. 19Thlam khuhnak cu tuukawng phaw si sen in buhmi in an ser i cu khuhnak a khuh chintu cu saphaw ṭ ha ngaiin an ser. 20Pathian umnak thlam caah cun anri thing in vampang an ser hna. 21Vampang cu pe hleinga sau le lehhmah kul le pasarih kau cio an si i 22pakhat le pakhat pehnak dingah aa rupmi a fong pahnih cio an ngeihter hna.

23Thlanglei kam caah vampang kul an ser hna i 24an kedanh caah ngun in sermi kedanh sawm li an ser hna, tlap khat nih danh hnih cio an co i a fong an ngeihmi cio ah khan an danh hna. 25Cun thlam chaklei kam caah khan tlap kul an ser hna, 26tlap khat caah danh hnih lengmang in ngun kedanh sawm li an ser hna. 27Thlam hnulei, nitlaklei caah khan tlap ruk an ser hna,28cun thlam hnulei a kil veve caah khan tlap hnih an ser hna. 29Hi a kil tlap hna hi a hram in an i peh i a par tiang an i tlai, a kual hmasa bik tiang khan an i tlai. A kil vampang pahnih hna cu, cuticun ser an si.

30Cucaah vampang pariat le ngun kedanh hleiruk, tlap khat caah pahnih lengmang an si. 31Cun anri thing in thingthluan an ser hna, khattelei kap vampang caah thluan nga, 32khattelei kam vampang caah thluan nga, nitlaklei kam, a hnulei vampang caah thluan nga an ser hna. 33Cun a laifang thingthluan cu khattelei deng in khattelei deng tiang vampang laifang in an khan. 34Vampang cu sui an hut hna i thingthluan hrolhnak dingah khan sui kual an thlaih hna, sui kual zong cu sui in an hut ve hna.

35Puanzar cu tuuhmul a dum, sendung le a senmi le khumla hrual hmang ṭ hia in an ser hna i a cungah cherubim hmanthlak kha dawh tein an suai hna. 36Puanzar dohnak caah cun anri tung pali an ser hna i sui in an hut hna i sui sio an thlaih hna. Tung an dirnak caah cun ngun kedanh pali an ser hna.37Thlam chung luhnak innka caah tuuhmul a dum, sendung le a sen le khumla hrual hmang ṭ hia in puanzar an ser i dawh tein an ṭ amh.38Tung panga an ser hna i sio an thlaih cio hna, an lu lei kha le an fung kha sui an hut hna. Tung caah cun dar kedanh panga an ser hna.

*********************************** ***************

*********************************** ******************