E va na turaga ena Vei Yalayalati Vou eratou vakatokayacataki ena Filipi: 1.Na luvei Eroti. Turaga mai Ituria kei Tirakoniti mai na 4 BC me yacova na 34 (Luke 3:1). 2.Edua tale na luvei Eroti. E beitaka na watina – Erotiasa- o Joni na dauveipapitaiso ni a biuti Filipi ka tauri Eroti (Marika 6:17). 3.E dua vei iratou na apositolo (Maciu 10:3). 4.Filipi na “daukaulotu”(Cakacaka 21:8). Na “dauveivakalotutaki” e vuqa na nona itutu ena lomani Lotu: Tuirara (Cakacaka 6:5) Dauvunau (Caka. 8:5) Daukaulotu (Caka. 8:26 ) Dauveivak alotutaki (Caka. 8:40) Dauveiciqomi (Caka. 21:8)

“A sa vinaka vei ira kecega na lewe vuqa na vosa oqo: a ra sa digitaki Sitiveni, e dua na tamata sa sinai e na vakabauta kei na Yalo Tabu, kei Filipi, kei Pirokoro, kei Nikanori, kei Taimoni, kei Parimina, kei Nikola, a tamata lotu vaka-Jiu mai Anitioki.” (Cakacaka 6:5) E.G.W. (Colporteur Ministry, cp. 6, pg. 46)

“ Sa qai lako sobu ko Filipi ki na koro ko Samaria, a sa vunautaki Karisito kivei ira.” (Cakacaka 8:5) E gole sobu i Samaria o Filipi ena vuku ni veivakararawataki e tekivuna o Saula ni oti na mate nei Sitiveni. Dina ni tiko na duidui ena kedra maliwa na Jiu kei na kai Samaria, ia e vunautaka vakaukauwa na Kosipeli e Samaria. Na nona vunau e yaco kina me ra ciqomi Jisu me nodra ivakabula na kai Samaria ka ra papitaiso.(Cakacaka 8:12). “E sega ni nodra itavi ga na talatala tabaki na kena vakayacori na itavi ni kaulotu. O ira kece sara era sa ciqomi Karisito era sa kacivi me ra vakaitavi ena cakacaka ni veivakabulai.” E.G.W. (The Acts of the Apostles, cp. 11, pg. 110)

E gole yani ena marau ena nona ilakolako na dauniyau ni oti na nona papitaiso. E sa tu vakarau me kacivaka na Tukutuku Vinaka e Aferika.. E vakayacora na vei talaki nei Jisu ena Cakacaka 1:8 o Filipi. E a vakadinadina e Jiutia (tuirara), e Samaria (dauvunau) kei na icavacava kei vuravuira (daukaulotu vua na kai Iciopea). E vakamuria na ivakaraitaki nei Jisu ena gaunisala ki Emeo (Luke 24:7). E vakatavulica vua na turaga ni Iocepea e dua na vuli Vola Tabu ka semati kina na i Vola Tabu taucoko.

“ Na kai Iciopea e vakaraitaka e dua na kumukumu levu era gadreva tu me ra tuberi mai vei ira na daukaulotu vaka taki Filipi – tamata e rogoca na domo ni Kalou ka lako kina vanua era sa talai kina. E lewe vuqa era wilika tiko na Vosa ni Kalou ia era sega ni kila na kena inaki dina ni nodra bula. E vuqa sara vei keda na tamata e vuravura eda vakanamata kece tiko ki lomalagi ena yalo bibi. E rogo mai na tagi, masu kei na kerekere mai na vei yalo yadudua ka tagica tu na rarama, loloma kei na Yalo Tabu. E levu era sa voleka sara tu; ka sa qai vo ga mera mai vakasokumuni mera kau cake.” E.G.W. (The Cakacaka of the Apostles, cp. 11, pg. 109)

“A sa kune ko Filipi mai Asoto: a sa lakova na veikoro kecega ka vunautaka nai tukutuku vinaka, a sa yaco sara ki Sisaria.” (Cakacaka 8:40) Sa kauti Filipi na Yalo Tabu ki Asoto me la’ki tomana na nona veiqaravi. (Cakacaka 8:39). Oti sa qai lakova yani rauta e 100 Km (62 maile) ena veivakalotutaki e na tokalau e loma kei na baravi kei Isireli. “Na cakacaka ni Kalou e dodonu me sorovaki ka cabori vakatabaki ena vukuna ka me vakamatatataki vakatotolo na itavi. Me vaka na dauniveiqaravi yalo matua, sa dodonu mera vakayagataka na vei gauna kece sara e laurai rawa ena kena vakatavulici na loloma ni Kalou ka vakatorovolekataki na tamata vei Karisito..” E.G.W. (Christ Triumphant, October 28)

“E na mataka cake keitou sa lako yani koi keitou sa lako vata kei Paula, ka yaco ko Sisaria: ia keitou sa curu ki na vale i Filipi nai vakavuvuli, ko koya sa dua vei ira na lewe vitu, ka keitou sa tiko vata kaya. 9 A sa lewe va na luvena, eratou sa goneyalewa, a ratou sa dau parofisai..” (Cakacaka 21:8-9) E laurai na ivakarau ni lotu nei Filipi ena vei tikina oqori e cake. E dau veivosoti, veikauwaitaki, dau veivakalotutaki ka liuliu vinaka ni dua na matavuvale. O Paula ( na Saula makawa) e a digitaka me vakamatei o Sitiveni ka itau nei Filipi. Ia e guilecava o Filipi ka ciqomi Paula ena loma ni nona vale ni oti e 25 na yabaki. Eya dua vei ira na matai nil ewe vitu na tuirara o Filipi. Ia qo esa vakatokai toka me dauveivakalotutaki baleta na igu ni vunautaki ni Kosipeli e qarava tiko. Na va na luvena yalewa parofita e vakaraitaka ni daukaulotu talega ena loma ni nona matavuvale.

“ E dodonu meda sa uciwai vakatabui, ka me sala ni kena vakadroroi mai ni kalougata vakalomalagi vei ira na tamata. Na Yalo Tabu me sa curuma ka yavalata na soqosoqo lotu, ka vakasavasavataka ka semata vata na yalo ni tamata. O ira era sa bulu oti vata kei Karisito ena pabitaiso era sa dodonu mera tu cake mai ena bula vou, ka bula taka na roka ni bula vakataki Karisito. E soli tu vei keda edua na vei talai bibi vakalou. Sa rogo oti na vosa ni vei talai ena keda maliwa: “O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu; vakavulici ira me ra vakabauta na ka kece kau a vosa kina vei kemudou: ka mo dou kila, au sa tiko vata kei kemudou e na veisiga kecega, ka yacova nai vakataotioti kei vuravura.” E sa lumuti na nomu bula ena cakacaka ni kena kacivaki na kosipeli ni veivakabulai. Sa vu ni nomu kaukauwa na yalo dodonu kei Lomalagi.” E.G.W. (Testimonies for the Church, vol. 9, cp. 2, pg. 20)