Lesson 9 for August 29, 2015

“Parthia mi, Media mi, Elam mite le Mesopotamia gama teeng mite, Judea gam, Cappadocia gam, Pontus gam, Asia gam, Phrygia gam, Pamphylia gam, Egypt gam, le Cyrene khua kiang Libya gama teeng mite, Rome khuapi pana hong zin Judah mite le Judah mi a kisuaksakte, Crete mi le Arab mi ahi eite in amaute thugen eima pau ciat tawh i zak theih pen Pasian nasep hi” (Acts 2:9-11) Jesu' sawlna lianpen hong piak zawh ni 10 khit teh, Kha Siangtho kibuak in Peter in leitung mun tuamtuam a Jews mi honpi mai ah Jesu thu gen hi. Peter' thugen in haksa lo, siang in tel baih hi. Genkholhnate hong tangtung hi. (Acts 2:16-21). Jesu ii a etteh huai nuntakna leh abawl na lamdangte Thubu sungah kigenkhol zo hi. Amah tho kik zo a, Pasian ziat lam ah kilamto hi. (Acts 2:22-36). Hong sihna hangin ih lungdam hi, kisikkikna leh tui kiphumna tungtawn in mawhmaina ih ngah hi. (Acts 2:37-39).

“Caesarea ah Cornelius min nei, Italy galkap pawl a kici ah, zakhat-ukpa khat a om hi. Amah le a innkuanpihte khempeuh biakna ah kipumpiakin Pasian kihta uh hi. Amah in a kitasamte phaltakin pia a, Pasian kiangah ahun simin thu a ngen hi..” (Acts 10:1,2) Jew mite in vun ki-at lo mite kiangah thu agen ding uh hamsa hi. Tua manin Pasian in tumdang in na hong sem hi. Pasian in vantung mi hong sawl aa, tua manin Cornelius' inn ah gupna thu hong tung thei hi. Vantung mi in Cornelius kiangah lungdamna thu agen hilo hi, Pawlpi tawh kizom sak hi. Pasian in eite lungdamna thu kizelsak ding hong deih hi, hih in vantung mi' nasep hi lo hi.

“Tua ciangin Peter thugen kipan a, “Pasian in angvan tuam nei loin minam khempeuh panin amah kihta-a, a dik-a gamta mite khempeuh a sanna thu, amaan a hina teltakin ka thei ta hi.’” (Acts 10:34-35) Cornelius in Pasian deihna theih beh ding lawp mahmah hi. Tua manin vantungmi thu mang aa, tai 31 tak a gamla Joppa ah Peter zong dingin a mite sawl hi. Amah'n gospel thu hong sang hi, tua manin Pasian in Gentile te tungah a masa pen Kha Siangtho hong sawl hi. Tua in Peter leh adang Jews te lungsim lok hi. Pasian in mun khempeuh leh biaknate ah Amah a it mi nei kawikawi hi. Amaute kiangah gupkhiatna thu agen ding eite hong deih hi. Cornelius in Peter bia nuam hi (Acts 10:25), tua manin amah'n a thukzaw in gupna thu atheih nopna kilang hi (Acts 11:14).

“Tua aw in a nih veina hopih a, “Pasian in a sianga a bawlsa na khatpeuh, siang lo hi, ci kei in,” a ci hi.’” (Acts 10:15)  Puanzapi tawh kibang kiu li nei khat. Leitung.  Khe li nei ganhing, gamsa bokvak, vasate. Jews-mi ahi lote, Gentile te.  Peter aw tho in, tuate go inla ne in. “Tho inla, kumsuk in. Amaute kong sawl ahi manin, na zuih ding lungsit kei in,” (Acts 10:20).  Pasian in a sianga a bawlsa na khatpeuh, siang lo hi, ci kei in. “mi khatpeuh a siangtho lo ahikeh nin hi ka cih loh nadingin Pasian in hong lak zo hi.” (Acts 10:28) Ngeina kawmdalte a susia dingin Pasian in Peter mangmusak hi. Tua manin lungdamna thu Gentile-te kiangah kipuak thei hi.

Hih tangthu tungtawn in mi khempeuh Pasian mai ah santheih ahih hangin biakna khempeuh Pasian in sang lo, cih sinna ih ngah thei hi. Jesus pen "gupkhiatna lampi" dangte tawh ih teh theih ding hilo hi. Lampi khat bek om hi, “Jesu in ama kiangah, ‘Keimah in lampi, thutak, leh nuntakna ka hi hi. Kei tawn loin kuamah Pa kiang a tung thei kei hi.’” (John 14:6). “Pasian in a beisa hunin tua bang khuaphawklohna a kimuh-mawhbawl hangin tu-in amah in mun khempeuh ah mi khempeuh a kisik dingin thu pia zo hi.” (Acts 17:30) Mite om omna mun ah eite ih pai ding ahi hi. Amaute upna leh ngeinate zong ih zahtak ding ahi hi. A hoihzaw nuntakna, Lampi, amaute atawntung in ih lah det ding ahi hi.

“Gentile mite, a zawdeuh in Greek te, numei pasal kikal uangtat thei lua uh aa, a lungsim kikhel lo, gamtatsia-te nusia lo in thu-um hong suakna uh ah lauhuaina hong om hi. Jews Christian-te ahih leh dawibia-te'n thukham palsat aa atuat loh thangtatnate nadong ah thuak zolo uh hi. Tua manin Jews te in vun-atna leh zehtan thukham zuihnate pen thupisak in hong kikhel Gentile te ading cihtakna leh ki-apna sittelna in koih uh hi. Hih, lungsim kikhelna mann omlopi a thu-umte zongsatna pawlpi sungah kidalna ding cih amau ngaihsutna in thangtatna leh uangtatnate hangin kigensiatna, kimaizumsakna hong tun hi.” E.G.W. (The Acts of the Apostles, cp. 19, pg. 192)

Peter in Jerusalem pawlpi te kiangah ahong gen ciangin Judah thukham zuih ding vai ah kinialnate hong siang thei hi. Acts 11:1-18. Ahi zongin, Paul in Gentile te kiangah nasia takin thugen hong kipat ciangin buaina hong om semsem hi. Tua vai ah pawlpi in kikup theih nangin council kisam hi. (Acts 15:1-29). “A kisam a nuai-a kigente simloh a dang bangmah no tungah kong suat loh ding uh, Khasiangtho le kote in hoih ka sa uh hi: Milimte thoihna ante, sisan, ngawngheklup ganhingte sa, le numei-pasal paktatna na tang ding uh hi. Hih nate pelh le uh cin a hoiha gamta na hi ding uh hi.” (Acts 15:28-29) Tua thukikupna aa khensatnate in Jews leh Gentile thu-um mite kilawmtatna ah a kipawl khop theih nangun tawphah kician hong neisak hi. Tua in pawlpi sungah buainate a nasiat luat ma-a leptuah ding etteh huai hong bawlsak hi.

“Cornelius in azak thuhilhna khempeuh zuihnopna tawh nungta ahih manin Pasian in thumann a ngah nang vaihawmsak hi… Hih leitungah ah ei upmawh sangin Pasian' gam tawh a kinai mi tampi na om hi. Hih mawhna leitung khuamial pi sungah Topa in mi manpha tampi nei aa, tuate kiangah Ama sawltakte makaih ding hi. Christ a' ding a dingtang mite mun citeng ah om hi. Leitung nate tungah Pasian' pilna mite kipia dinga, amaute pen khuavak puakte suak ding uh hi. Christ itna in hong kaih bangin, amaute in mite Jesu kiang zuan sak ding hi.” E.G.W. (The Acts of the Apostles, cp. 14, pg. 140)